Stóri bróðir fylgist með þér

Eins og flestum ætti að vera orðið ljóst vill Steingrímur J. Sigfússon, formaður Vinstri grænna, setja á fót netlöggu til þess að hægt sé að fylgjast með ferðum manna á netinu. Með því vill hann hindra aðgang fólks að óæskilegu efni á internetinu að hans mati. Gera má þá ráð fyrir að Steingrímur hafi hugsað sér deild innan lögreglunar sem færi yfir alla tölvupósta, heimasíður og MSN samtöl sem tölvunotendur hérlendis senda og skoða.

Gæti þetta orðið svipað og í Kína að þegar ákveðin orð eru slegin inn á leitarvélum eða ákveðin orð send í tölvupóstum verði slökkt á internetinu hjá viðkomandi og lögreglan komi og færi mann í hlekkjum niður á Hverfisgötu. Segja má að Steingrímur sé að leggja til eftirlit í anda þeirrar hugmyndar sem skrifuð hefur verið skáldsaga um, þar sem ríkið eða ,,stóri bróðir” fylgist með fólkinu.

Ólíkt Steingrími, flestum eflaust til mikillar furðu, er ég þeirrar skoðunar að hver og einn hafi rétt til einkalífs. Í dag fara samskipti manna í síauknu mæli fram í gegnum internetið og mætti líkja þessari hugmynd Steingríms við að venjuleg samtöl fólks í heimahúsum væru skrásett af lögreglunni. Eini munurinn er sá að auðveldara er, að svo stöddu, að skrásetja fjarskipti en önnur samskipti.

Með tilkomu netlögreglu væri um að ræða harkalegt brot á friðhelgi einkalífsins. Það er því mikilvægt að frelsisskerðing á borð við þá sem Steingrímur boðar nái ekki grundvelli hérlendis. Hlutverk stjórnvalda á að vera það að standa vörð um friðhelgi einkalífsins en vitaskuld ekki að standa fyrir ritstjórnarstefnu fyrir þjóðina.

Steinar Þór Ólafsson
Höfundur situr í stjórn Frjálshyggjufélagsins og er nemi við Verzlunarskóla Íslands.
Grein birtist áður 2. mars á frelsi.is.