Hugleiðing

Mitt í daglegu amstri hversdagsins eigum við það til að gleyma okkur. Gleyma því að niðurstöður skoðanakannana segja bara hálfan sannleikan (á tíðum jafnvel minna), Ísland stóð sig bara nokkuð vel á HM (miðað við höfðatölu) og því að lönd þriðja heimsins, svokallaða, verðskulda athygli okkar.
Í bíóhúsum landsins er nú verið að sýna myndina “Blood Diamond” sem er afbragðs hugvekja í skammdeginu. Myndin tekur á málefni sem gera má ráð fyrir að sé ekki mörgum ofarlega í huga dagsdaglega, sölu ólöglegra demanta frá átakasvæðum í Afríku. Eins og málin standa í dag ríkir friður í langflestum ríkjum álfunnar en á árum 1990 til 2000 var þetta ein helsta leið uppreisnarhópa sem og stjórnvalda ríkja eins og Sierra Leone, Angóla og Líberíu til að fjármagna þau blóðugu stríð sem þar geysuðu. Reyndar var hlutfall demanta frá Afríku einugis í kringum 20% en í iðnaði sem veltir tugum milljarða á ári má gera ráð fyrir að fleiri milljónir hafi farið á beinan og óbeinan hátt í að binda enda á líf þúsunda saklausra borgara í þessum löndum.
Það var ekki fyrr en 1998 sem Sameinuðu þjóðirnar tóku sig til og hófu umræðuna um blóð demanta og tveimur árum síðar, í maí 2000 hittust svo allar þeir þjóðir Afríku sem stunduðu demantaútflutning, í Kimberly í S-Afríku, og komu sér saman um aðferðir til að bera kennsl á þá demanta sem komu frá átakasvæðum.
Í dag getum við verið nokkuð örugg um að þeir demantar sem í umferð eru séu “átakalausir” en engu að síður er vert að hafa þetta í huga.
Á hverri mínútu deyja tvö börn úr malaríu, einn af hverjum tíu er smitaður af HIV-veirunni í S-Afríku og fleiri milljónir hafa látist í borgarastyrjöldum síðustu áratugi. Látið þessar staðreyndir hafa áhrif á ykkur, munið þær og þekkið.