Gott hjá garðbæingum

Það leikur enginn vafi á því að Garðabæ hefur verið vel stjórnað síðustu fjögur ár. Nú hafa verk sjálfstæðismanna verið sett í dóm kjósenda sem greinilega vilja áframhaldandi forystu. Við sem ungir garðbæingar höfum fjóra sterka málsvara í lista flokksins þar sem einn mun starfa sem bæjarfulltrúi og einn sem varabæjarfulltrúi. Þetta hlýtur að teljast mikið fagnaðarefni.

Það er þó nokkuð um málefni ungra garðbæinga á stefnuskrá flokksins og því mikilvægt að við fáum úr þeim unnið. Þau málefni sem eru efst á baugi hjá ungum eru meðal annars krafa okkar um að geta keypt húsnæði á sanngjörnu markaðsverði og að fá úthlutaðar lóðir á sanngjörnu matsverði. Fjölgun battavalla sem ekki eru stundaðar æfingar á. Að koma upp fullnægjandi æfingaraðstöðu fyrir fimleikafólk og að bæta sundlaug bæjarins.

Ég er ekki í nokkrum vafa um að úr þessum málefnum verði unnið og að ánægja meðal ungs fólks í Garðabæ verði meiri eftir fjögur ár heldur en hún er í dag. Þess vegna hvet ég áhugasama til þess að leita upplýsinga um starf Hugins því nóg er af verkefnum fyrir næstu fjögur ár.