Stelpur í Sjálfstæðisflokknum

Eru stelpur hræddar við að taka pólitíska afstöðu? Ef svo er þá hafa stelpur í Sjálfstæðisflokknum sýnt okkur undanfarin ár að það er engin ástæða til. Lengi vel var dæmigert fyrir stjórnmál að vera aðeins fyrir karla og því miður telja ennþá einhverjir að Sjálfstæðisflokkurinn sé tákngervingur karlaveldisins. Það er mikill misskilningur og þeir sem halda því fram hafa væntanlega ekki kynnt sér vel söguna og þróunina í flokknum. Stelpur í Sjálfstæðisflokknum geta verið stoltar því Sjálfstæðisflokkurinn var fyrstur til að koma konum á framfæri í stjórnmálum. Þar ber helst að nefna Auði Auðuns sem var fyrst kvenna til að verða ráðherra, en hún var skipuð dómsmálaráðherra árið 1970. Á árunum 1959 – 1960 varð hún fyrst kvenna borgarstjóri í Reykjavík. Skömmu síðar kom önnur kona úr röðum sjálfstæðismanna fram á sjónarsviðið en það var Ragnhildur Helgadóttir sem var skipuð menntamálaráðherra árið 1983.

Mér finnst algjört rangnefni á flokkinn að titla hann karlaflokk sérstaklega í ljósi þess að í fremstu röðum flokksins í dag eru einmitt kvenmenn. Af þessum konum fer fremst í flokki Þorgerður Katrín Gunnarsdóttir og í grein um stelpur í Sjálfstæðisflokknum verður að sjálfsögðu að fjalla stuttlega um störf Þorgerðar innan flokksins.

Þorgerður hefur rutt margar ótroðnar slóðir fyrir stelpur í stjórnmálum. Hún er núverandi menntamálaráðherra og var fyrsta konan til að setjast í stól forsætisráðherra og stjórna ríkisstjórnarfund í fjarveru Geirs H.Haarde forsætisráðherra. Hún á glæstan feril innan Sjálfstæðisflokksins og er nú fyrsta konan til að gegna embætti varaformanns Sjálfstæðisflokksins.

Þorgerður hefur öflugt kvennahaf á bak við sig innan Sjálfstæðisflokksins en í miðstjórn flokksins eru níu af ellefu kjörnum fulltrúum konur. Það er því augljóst að stelpur eru metnar að verðleikum í Sjálfstæðisflokknum og flokksmenn treysta þeim til að gegna mikilvægum störfum innan flokksins.

Önnur sjálfstæðiskona sem staðið hefur okkur Garðbæingum nær er Ásdís Halla Bragadóttir. Ásdís Halla hefur lengi verið starfandi fyrir Sjálfstæðisflokkinn og unnið sér gott orð innan hans. Ásdís Halla opnaði augu margra fyrir möguleikum stelpna innan Sjálfstæðisflokksins. Hún var fyrst kvenna kjörinn formaður Samband ungra sjálfstæðismanna (S.U.S) og þá var Ásdís Halla fyrst kvenna bæjarstjóri í Garðabæjar.

Það sem Ásdís Halla og Þorgerður Katrín eiga sameiginlegt annað en það að vera ungar og efnilegar sjálfstæðiskonur er að þær koma okkur fyrir sjónir sem ákveðnar stelpur sem þora að taka sterka pólitíska afstöðu. Þær sýna og sanna fyrir öðrum stelpum í flokknum að feimnin kemur okkur skammt áfram.

Þá ber að nefna að í kjöri til formennsku Heimdallar þetta árið voru tveir frambjóðendur og báðir voru stelpur. Þetta var í fyrsta sinn í sögunni sem eingöngu stelpur voru í framboði. Sigurvegarinn, Erla Ósk Ásgeirsdóttir, er önnur kvenna formaður Heimdallar.

Gengi kvenna í prófkjöri Sjálfstæðisflokksins fyrir borgarstjórnarkosningar á síðasta ári var afar gott. Í prófkjörinu voru tuttugu og fimm þátttakendur, þar af tuttugu karlmenn og fimm kvenmenn. Niðurstaða prófkjörsins var sú að karlar og konur skipuðu efstu tíu sætin til helminga sem þýðir að allar konurnar sem buðu sig fram voru kjörnar inn á lista. Þetta sýnir svart á hvítu að konur standa ekki höllum fæti gagnvart körlum þegar kemur að lýðræðislegum kosningum innan Sjálfstæðisflokksins. Ein af þessum mjög svo frambærilegu konum er Hanna Birna Kristjánsdóttir sem nú er forseti borgarstjórnar Reykjavíkur.

Í kjölfar þessara staðreynda kem ég aftur að spurningunni sem ég varpaði fram í upphafi greinarinnar. Eru stelpur hræddar við að taka pólitíska afstöðu? Staðreyndin er sú að alltof margar stelpur eru smeykar við að tjá sig um stjórnmál. Ég tel að stelpur í Sjálfstæðisflokknum hafi sýnt það með verkum sínum og störfum að slíkt er ástæðulaust. Sem dæmi um að stelpur haldi út pólitískri málefnalegri umræðu má líta á mjög áhugaverða vefsíðu, tikin.is. Síðunni er haldið uppi af ungum og efnilegum stelpum sem eru óhræddar við að segja sína skoðun á hlutunum.

Þó nokkuð sé síðan stelpur hófu að láta til skarar skríða innan Sjálfstæðisflokksins bendir ekkert til þess að sé lát á því. Við erum óhræddar að feta nýjar slóðir en því miður eru ótroðnar slóðir kvenna í stjórnmálum ennþá mjög margar. Það þýðir ekki að láta deigan síga heldur verðum við að halda vel á spöðunum, þjóðfélaginu til góðs. Aftur á móti ætti ekki að koma á svokölluðum kynjakvótum innan flokksins þar sem jafnrétti verður aldrei náð fram með ójafnrétti. Sýn beggja kynja á hlutina bætir þjóðfélagið.

Stelpur eiga jafnmikla möguleika og strákar innan Sjálfstæðisflokksins. Í Sjálfstæðisflokknum eru stelpur á réttum vettvangi til að skara fram úr. Máltækið segir að hver sé sinnar gæfu smiður og því hvet ég allar stelpur til að ganga í Sjálfstæðisflokkinn og láta ljós sitt skína.

Höfundur situr í stjórn Hugins 

Birtist áður í 1.tbl. Hægri