Sýnilegri löggæslu í Garðabæ

Í aðdraganda prófkjörs Sjálfstæðismanna fyrir síðastliðnar sveitastjórnarkosningar tók ég þátt í því að hringja út fyrir einn frambjóðandann. Ég spjallaði við marga garðbæingana á þessum dögum og ræddi ég við þá hin ýmsu málefni. Eitt þeirra málefna sem mér fannst allir geta verið sammála um er að lögreglan í Garðabæ er alls ekki nógu sýnileg.

Á síðustu árum hefur glæpum í Garðabæ fækkað ef frá eru taldar haldlagningar á fíkniefnum sem aukist hafa um 95%. Ef aukning á haldlagningum er ekki talin með þá eru tölurnar nokkuð jákvæðar en það merkir ekki að sofna megi á verðinum. Mikill fælingarmáttur er fólginn í sýnilegri löggæslu og getum við því áætlað að sýnileg löggæsla muni draga úr hraðakstri, sporna gegn innbrotum og alls kyns glæpum. Garðabær hefur lengi reynt að minnka hraðakstur í kringum skólana en ekki man ég eftir að hafa séð lögreglubíla markvisst í kringum þessi svæði.

Krafa bæjarbúa er greinilega að lögreglan sé sýnilegri í bænum því ef við viljum ná árangri í að sporna gegn hraðakstri þá þarf meira en bara viðvörunarborða yfir göturnar.

Höfundur situr í stjórn Hugins