Stúdentar standa fyrir meðmælum

Stúdentaráð Háskóla Íslands stendur fyrir meðmælum undir yfirskriftinni „Vér meðmælum öll“ í dag. Klukkan 15.00 munu stúdentar við Háskóla Íslands og aðrir sem láta sig menntamál þjóðarinnar varða koma saman fyrir utan Aðalbyggingu Háskóla Íslands í þeim tilgangi að mæla með menntun og koma menntamálum í umræðuna fyrir næstu Alþingiskosningar. Þaðan verður gengið niður á Austurvöll með meðmælaskilti á lofti og klukkan 15.30 hefst stutt fundardagskrá.

Ræðumenn verða Sigurður Örn Hilmarsson, formaður Stúdentaráðs HÍ, Jón Torfi Jónasson, prófessor við Háskólann, og Kristín Tómasdóttir, stúdentaráðsliði.

Að fundardagskrá lokinni munu stúdentar reisa menntavörðu á Austurvelli, sem ætlað er að vísa Alþingismönnum veginn í átt að þekkingarþjóðfélaginu sem Íslendingar vilja byggja.