Gera lítið úr landnámi Rússa á Norðurpólnum

Rúv.is: Utanríkisráðherra Kanada gerir lítið úr landnámi Rússa á Norðurpólnum í
dag. Rússneskir vísindamenn urðu þeir fyrstu í dag til að komast á
hafbotninn undir íshellu norðurpólsins á rúmlega 4000 metra dýpi.
Könnunarkafbáturinn Mir-1 kom þar fyrir títanhylki með rússneska
fánanum. Rússar vilja færa út 200 mílna efnahagslögsögu sína og eigna
sér hafsbotninn við Norðurpólinn. Þar gæti verið að finna bæði olíu og
gas.

Peter MacKay, utanríkisráðherra Kanada, sagði í dag að Rússar
gætu ekki farið um með fána og eignað sér svæði. Utanríkisráðherra
Rússa, Sergei Lavrov, segir hinsvegar að fáninn skipti ekki máli.
Tilgangur ferðarinnar hafi verið að sýna fram á að Norðurpóllinn sé á
landgrunni Síberíu og tilheyri því Rússlandi.

Einn af
sjávarkönnuðum Rússa, Artur Chilingarov, sagði við rússneska
ríkissjónvarpsstöð í dag að lendingin á hafsbotninum hefði verið mjúk.
Engar djúpsjávarskepnur hafi sést aðeins ljósbrún möl.