Framhaldsskólakennarar vilja hærri laun

Rúv.is: Framhaldsskólakennarar telja að laun þeirra hafi ekki fylgt launum
þeirra stétta sem þeir bera sig saman við. Formaður Félags
framhaldsskólakennara segir að fái framhaldsskólar ekki meira fjármagn
til að sinna sínum störfum sé það ávísun á vandræði. Of snemmt sé þó að
segja um hvort verkfall sé í sjónmáli.

Kjarasamningar Félags
framhaldsskólakennara losna í apríl á næsta ári. Í ályktun sem félagið
hefur sent frá sér kemur fram að laun þeirra hafi verið nánast þau sömu
og laun ríkisstarfsmanna innan BHM árið 2002. Nú séu laun
framhaldsskólakennara 6% lægri. Aðalheiður Steingrímsdóttir formaður
Félags framhaldsskólakennara segir þá ekki hafa notið þess launaskriðs
sem orðið hafi síðustu árin. Hún minnir á að framhaldsskólakennurum
hafi tekist að ná sambærilegum kjörum og þessar stéttir með 8 vikna
verkfalli árið 2000. Það hafi aðeins haldið í 2 ár.

Aðalheiður
telur einnig að framhaldsskólum sé of naumt skammtað í fjárlögum,
þannig að erfitt sé fyrir þá að sinna lögboðnum skyldum. Hún telur of
snemmt að fullyrða um hvort hugsanlega verði gripið til
verkfallsaðgerða.

Meðaldagvinnulaun framhaldsskólakennara voru í lok síðasta árs tæplega 286.000 krónur.