Rúv.is: Ásmundur Helgason, markaðsstjóri Birtíngs,
segir áfengislögin gölluð og spyr hvers vegna Áfengis- og tóbaksverslun
ríkisins sé frjáls að auglýsa, bæði á Netinu auk þess sem ÁTVR gefi út
bæklinga um áfengi í 15.000 eintökum. Ásmundur segir að Birtíngur ætli
ekki að breyta stefnu sinni um áfengisauglýsingar í tímaritum félagsins.

Karl
Garðarsson, fyrrverandi ritstjóri Blaðsins, hefur í héraðsdómi verið
dæmdur til að greiða eina miljón króna í sekt vegna áfengisauglýsinga
sem birtust í blaðinu í hittiðfyrra. Karl ætlar ekki að una dóminum,
hyggst áfrýja honum til Hæstaréttar. Útgáfufélagið Birtíngur er
sjálfsagt stærsta tímaritaútgáfa landsins og gefur út átta tímarit, þar
á meðal Ísafold, Mannlíf, Gestgjafann og fleiri. Fjallað er um áfengi í
þessum tímaritum, með ýmsum hætti.

Ásmundur Helgason segir
dóminn athyglisverðan fyrir nokkrar sakir. Hann bendir á að
umboðsaðilar áfengisins sem um ræðir í dómnum hafi hvorki verið dæmdir
né kallaðir til yfirheyrslu vegna málsins og því löngu tímabært að
endurskoða lögin. Ásmundur segir jafnframt að aðalsamkeppnisaðilar
Birtíngs séu erlend tímarit og að í þeim megi sjá fjölda
áfengisauglýsinga. Þá segir hann það tvískinnung hjá íslenska ríkinu að
banna fjölmiðlum að auglýsa áfengi en geri það sjálft með því t.d. að
gefa út bækling í 15.000 eintökum og auglýsa spænska daga.