Rúv.is: Aðskilnaðar- og ógnarverkasamtökin ETA ætla
á morgun að binda enda á vopnahlé sem verið hefur í gildi frá því á
síðasta ári, á milli samtakanna og spænskra stjórnvalda.

Yfirlýsingin
var birt í dagblaðinu Berria. Þar segir að forsendur séu brostnar og að
skilyrði sem sett hafi verið séu ekki lengur til staðar. Einnig kemur
fram að frá og með morgundeginum muni samtökin verja baskneska grund
með vopnum á öllum vígstöðvum.

Varanlegu vopnahléi var lýst
yfir í mars í fyrra. Samtökin hafa haldið því fram að það hafi haldið
þrátt fyrir sprengjuárás sem varð tveimur að bana á flugvelli í Madrid
í desember. Eftir sprengjuárásina var friðarviðræðum við samtökin hætt.

Yfirlýsingin nú er talin þýða að önnur stór árás gæti verið
yfirvofandi að sögn fréttaskýrenda. Samtökin hafa myrt yfir 800 manns á
undanförnum fjórum áratugum en samtökin berjast fyrir sjálfstæðu ríki á
Norður-Spáni og Suðvestur-Frakklandi. Undanfarin ár hefur árásum
samtakanna farið fækkandi þrátt fyrir sprengjuárásina í desember.