Charles Taylor fyrir stríðsglæpadómstólinn

Rúv.is: Charles Taylor, fyrrverandi forseti Líberíu, var ekki viðstaddur í
dag þegar réttarhöld hófust yfir honum fyrir stríðsglæpadómstóli
Sameinuðu þjóðanna í Haag.

Taylor er ákærður fyrir stríðsglæpi
og glæpi gegn mannkyninu í borgarastyrjöldinni í Sierra Leone. Er hann
fyrsti Afríkuleiðtoginn sem dreginn er fyrir alþjóðlegan glæpadómstól.
Taylor hefur neitað öllum sakargiftum. Búist er við því að réttarhöldin
muni vara í allt að átján mánuði, þá hafa bresk stjórnvöld boðist til
þess að fangelsa Taylor verði hann fundinn sekur.

Charles
Taylor hóf borgarastyrjöld í Líberíu árið 1989 og varð einn af
stríðsherrum landsins sem kepptist við að ná völdum í landinu. Það
gerði hann árið 1997 í forsetakosningum. Í kjölfar þeirra var endi
bundinn á borgarastyrjöldina. Taylor hrökklaðist frá völdum árið 2003
eftir uppreisn skæruliða sem neyddu Taylor í útlegð til Nígeríu.
Forsetinn fyrrverandi var fluttur frá Nígeríu í fyrra til Haag, þar sem
hann mun í dag koma fyrir stríðsglæpadómstólinn.