Samstarf HÍ og Harvard um krabbameinsrannsóknir

Mbl.is: Fulltrúar Miðstöðvar í lýðheilsuvísindum við
Háskóla Íslands og faraldsfræðideildar Harvard Háskóla skrifa í næstu
viku undir viljayfirlýsingu um samstarf sem felur í sér sameiginleg
rannsóknarverkefni og uppbyggingu á framhaldsmenntun í
lýðheilsuvísindum við Háskóla Íslands.

Þannig
vilja skólarnir sameiginlega stuðla að hágæða vísindastarfi. Hornsteinn
samstarfsins er fyrirhugað rannsóknarverkefni á krabbameini í
blöðruhálskirtli sem byggir á einstökum íslenskum gögnum.

Í
tilkynningu frá HÍ segir, að krabbamein í blöðruhálskirtli hafi farið
ört vaxandi og sé nú næstalgengasta dánarorsökin vegna krabbameina
hérlendis. Samanborið við önnur álíka algeng krabbamein hafi krabbamein
í blöðruhálskirtli þó verið minna rannsakað og fátt vitað um
áhrifaþætti nýgengis og framvindu sjúkdómsins.