Nýtt kalt stríð í uppsiglingu

Rúv.is: Vígbúnaðarkapphlaup er hafið á ný milli Bandaríkjanna og Rússlands ef
tekið er mið af fréttum frá stjórnvöldum í Moskvu. Samskipti þjóðanna
hafa ekki verið jafn stirð í áratug.

Rússar undirbúa nú sitt eigið
eldflaugavarnarkerfi sem svar við kerfi Bandaríkjamanna sem staðsett
verður í Póllandi og Tékklandi. Aðgerðir Rússa fela í sér endurnýjun
kjarnaodda, fjölgun þeirra og færslu kjarnorkukafbáta til norðurpólsins
þar sem þeir verða nánast ósýnilegir. Þetta kemur fram í blaðinu The
Guardian. Þá segja ráðamenn ljóst að eftir fall Sovétríkjanna árið 1991
hafi Bandaríkjamenn hagað sér eins og þeir hafi sigrað í kalda
stríðinu. Rússar hafi vonast eftir samstarfi, en það ekki orðið með
þeim hætti sem þeir vonuðust eftir.

Lavrov, utanríkisráðherra
Rússa, skrifar í dagblaðið Financial Times í dag að hugmyndir
Bandaríkjamanna um eldflaugavarnarkerfi séu óviðunandi, slíkt kerfi
myndi breyta hernaðarlandslaginu í Evrópu í grundvallaratriðum. Rússar
myndu ekki sætta sig við bandarískt eldflaugavarnarkerfi í hjarta
Evrópu, nánast við dyraþrep Rússlands.