Kærði Bleikt og blátt til lögreglu

Vísir.is: Akureyringur á tvítugsaldri fór með eintak af tímaritinu Bleiku og bláu á lögreglustöð á dögunum og tilkynnti glæp. Áður hafði honum verið tjáð að klám væri bannað en erfitt væri að skilgreina það. Þess vegna væru klámblöð seld í verslunum þrátt fyrir lögin.

„Lögreglumaðurinn sem tók á móti mér vissi ekki í hvorn fótinn hann átti að stíga," segir maðurinn, Ólafur Eiríkur Þórðarson. „Ég fæ að vita á mánudaginn hvort eitthvað verður aðhafst í þessu. Ég er ekki á móti klámi, en mér finnst fáránlegt að byggja lög á óskilgreinanlegum hugtökum og vil fá úr þessu skorið."