Stjórnarandstaðan styður stjórnarskrábreytingu

Mbl.is: Stjórnarandstöðuflokkarnir þrír tilkynntu á blaðamannafundi í dag, að þeir væru tilbúnir til að greiða fyrir því á Alþingi í vor, að ákvæði um þjóðareign á náttúruauðlindum verði tekið upp í stjórnarskrá. Hafa þingflokkarnir samþykkt, að líta á þetta sem forgangsmál á vorþingi og bjóðast til að lengja þingið ef þörf krefur.

Össur Skarphéðinsson, þingflokksformaður Samfylkingar, sagði að með þessu væri stjórnarandstaðan að bjóða ríkisstjórninni upp í dans og boltinn væri hjá stjórnarflokkunum. Steingrímur J. Sigfússon, formaður VG, sagði á blaðamannafundinum, að það væri skynsamlegt að tengja þetta við hliðstæð umhverfisverndarákvæði, sem tekin hafa verið inn í stjórnarskrár í Noregi og Finnlandi. Guðjón A. Kristjánsson, formaður Frjálslynda flokksins, sagði þó að stjórnarandstaðan vildi fyrst og fremst ljúka þessu auðlindarákvæði.

Í tilkynningu, sem lögð var fram á fundinum, segir að það sé sameiginlegt mat þingflokka stjórnarandstöðunnar, að sá efniviður og tillögugerð, sem fyrir liggi í áliti auðlindanefndar frá árinu 2000 og í tillögum vinnuhóps stjórnarskrárnefndar um auðlinda-, umhverfis- og mannréttindamál, myndi fullnægjandi grundvöll til að ljúka málinu.

Fram kom á fundinum, að í ljósi þess að meirihluti sé á Alþingi fyrir þessum breytingum, í ljósi yfirlýsinga ráðherra Framsóknarflokksins undanfarið, væri annað óforsvaranlegt en að koma þeim á. Steingrímur sagði á fundinum, að Framsóknarflokkurinn væri nú búinn að vera í ríkisstjórn í 4300 daga og tæki málið upp nú þegar 75 dagar væru eftir af kjörtímabilinu. Því væri augljóslega verið að leika þann leik, að taka hamskiptum fyrir kosningar.