Lögbrot að líkja lögreglu við hund

Mbl.is: Tveir indónesískir söngvarar komu fyrir rétt í dag ákærðir fyrir að móðga lögregluna fyrir lag sem þeir fluttu á tónleikum á indónesísku eyjunni Bali til styrktar þeim sem misstu allt sitt í jarðskjálfta á Jövu í maí. Í textanum er lögreglu líkt við hund. Eiga þeir yfir höfði sér allt að átján mánaða fangelsi.

Samkvæmt indónesísku fréttastofunni Antara segir í textanum að „ég hélt að þetta væri glæpamaður en þetta reyndist vera lögregluþjónn sem hegðaði sér eins og hundur".

Mennirnir voru handteknir í júlí en það að líkja einhverjum við hund þykir meiriháttar móðgun í Indónesíu. Eru mennirnir ákærðir fyrir brot á lögum sem banna það að opinberir aðilar séu móðgaðir á almannafæri.