Ráðherra óttast kennaraverkfall

Rúv.is: Þorgerður Katrín Gunnarsdóttir menntamálaráðherra segir ólíðandi ef stefni í verkfall grunnskólakennara í haust. Formaður félags grunnskólakennara telur fráleitt að launahækkun sem þeim hefur verið boðin dugi til að bæta kjaraskerðingu vegna verðbólgu og betri kjara annarra stéttarfélaga.

Launanefnd sveitarfélaga hefur boðið kennurum 0,75% kauphækkun sem Ólafur Loftsson, formaður Félags grunnskólakennara, segir of lítið enda hafi grunnskólakennarar dregist umtalsvert aftur úr leikskólakennurum.

Grunnskólakennarar fóru síðast í verkfall haustið 2004. Verkfallinu lauk þegar naumur meirihluti samþykkti nýjan kjarasamning en sá samningur rennur út í árslok verði honum ekki sagt upp fyrr. Þorgerður Katrín óttast að verkfall kunni að bresta á.