Samgönguáætlun: Sundabraut, göng og breikkun

12. febrúar 2007

Rúv.is: Áætlað er að nota 33 miljarða króna til að breikka Hringveginn frá Markarfljóti vestur um og norður til Akureyrar á næstu 12 árum samkvæmt samgönguáætlun sem kynnt var í dag. 20 miljarðar eru fráteknir vegna Sundabrautar.

Sturla Böðvarsson samgönguráðherra kynnti nýja samgönguáætlun á Ísafirði í dag. Áætlunin er tvíþætt, annars vegar áætlun til næstu 4 ára að þessu ári meðtöldu, hins vegar stefnumótandi áætlun til 12 ára. Áætlunin verður lögð fyrir Alþingi til afgreiðslu og ákvarðast framkvæmdir í samgöngumálum næstu árin af þeirri afgreiðslu.

Að þessu sinni eru stærri fjárhæðir í samgönguáætlun en áður hafa sést. Fjárfrekustu liðirnir eru þrír; Sundabraut, breikkun hringvegarins og jarðgöng. Gert er ráð fyrir tæpum 38 miljörðum króna í jarðgöng næstu 12 árin, þar af á næstu fjórum árum tæpum 4 í Óshlíðargöng og tæpum 8 miljörðum í Héðinsfjarðargöng. Á öðru og þriðja tímabili langtímaáætlunarinnar er gert ráð fyrir göngum milli Arnarfjarðar og Dýrafjarðar, Norðfjarðargöngum, Lónsheiði og öðrum jarðgöngum. Gert er ráð fyrir 300 miljóna króna framlagi til Vaðlaheiðarganga á fyrsta tímabilinu.

Hringveginn á að breikka í áföngum fyrst frá Selfossi upp í Borgarnes, á síðasta tímabilinu, 2015-18, frá Markarfljóti að Selfossi og frá Borgarnesi til Akureyrar. Samtals er gert ráð fyrir 33 miljörðum króna í þetta verkefni.

Sundabraut er á dagskrá strax frá og með þessu ári, gert ráð fyrir 8 miljörðum til þeirrar framkvæmdar á fyrsta tímabili og 12 milljörðum á því næsta, 2011-14.

Meðal annarra framkvæmda má nefna lengingu flugbrauta á Akureyrar- og Egilsstaðaflugvöllum, norðaustur-suðvesturflugbrautin á Keflavíkurflugvelli verður tekin í notkun og samgöngumiðstöð byggð í Reykjavík.