Ráðherra vill skoða aldurstakmark á útihátíðum

Mbl.is: Magnús Stefánsson, félagsmálaráðherra, segist hafa mikinn áhuga á að skoða að setja aldurstakmark á útihátíðum í samráði við dóms- og kirkjumálaráðuneytið og aðra þá aðila er kæmu að slíkri ákvörðun. Segist ráðherra hafa ráðherra áhyggjur af því hvernig unglingar undir 18 ára aldri safnast saman á misskipulögðum hátíðum víða um land, ekki einungis um verslunarmannahelgina, heldur einnig um aðrar helgar sumarsins.

Þetta kemur fram í svari við fyrirspurn Kolbrúnar Baldursdóttur á Alþingi um hvort ráðherra hafi íhugað eða áformi að setja 18 ára aldurstakmark á skipulagðar útihátíðir, eða sjá til þess að börn undir 18 ára aldri fái einungis aðgang að slíkum hátíðum séu þau í fylgd með fullorðnum.

Í svarinu segir að ríkisstjórnin hafi samþykkt að fela félagsmálaráðuneytinu að hafa forystu í samstarfi þeirra, sem starfa að forvörnum og móta heildstæða forvarnastefnu.

Skipaður var fimm manna stýrihópur til þess að leiða verkefnið undir forystu Ingibjargar Pálmadóttur, fyrrverandi heilbrigðis- og tryggingamálaráðherra. Segir félagsmálaráðherra, að hópurinn hafi þegar haldið fundi með fjölmörgum aðilum, sem þekkja fíkniefnavandann og forvarnastarf af eigin raun, einkaaðilum, félagasamtökum og opinberum aðilum. Stýrihópurinn hefur skilað ráðherra drögum að heildstæðri forvarnastefnu sem send var fjölmörgum aðilum til umsagnar og hafa umsagnir verið að berast ráðuneytinu nú í janúar.

Félagsmálaráðherra segir, að ein af meginástæðum þess að málið var sett í forgang sé sú að hann hafi áhyggjur af því hvernig unglingar undir 18 ára aldri safnast saman á misskipulögðum hátíðum víða um land, ekki einungis um verslunarmannahelgina, heldur einnig um aðrar helgar sumarsins. Magnús kallaði í sumar saman fulltrúa ráðuneyta, opinberra stofnana, félagasamtaka og fyrirtækja og segist hafa fundið mikinn samhug og eindreginn vilja til þess að samhæfa kraftana betur en gert hefur verið. Í framhaldi af því var hrint af stað auglýsingaherferð fyrir síðastliðna verslunarmannahelgi þar sem foreldrar voru hvattir til að sýna aukna ábyrgð í þessum efnum.