Auknu jafnvægi spáð

Rúv.is: Fjármálaráðuneytið spáir auknu jafnvægi í hagkerfinu á næstu tveimur árum. Viðskiptahalli dragist saman, atvinnuleysi aukist og verðbólga fari niður í 2,5% í lok þessa árs.

Þjóðhagsspá fjármálaráðuneytisins er nokkuð bjartsýn að þessu sinni. Gert er ráð fyrir samdrætti í fjárfestingum og einkaneyslu á þessu ári og að viðskiptahallinn dragist hratt saman vegna aukins útflutnings áls og minni innflutnings. Hagvöxtur verði í auknum mæli knúinn áfram af utanríkisviðskiptum.

Ráðuneytið spáir því auknu jafnvægi í hagkerfinu, meira atvinnuleysi en auknum kaupmætti vegna hærri launa og lægri skatta. Þá er gert ráð fyrir 3,8% verðbólgu að meðaltali á þessu ári, en hún mælist nú tæp 7%. Fjármálaráðuneytið spáir því að 2,5% verðbólgumarkmiði Seðlabankans verði náð á síðari hluta ársins.

Á næsta ári er gert ráð fyrir að þessi þróun haldi að miklu leyti áfram þótt vöxtur einkaneyslu aukist lítillega að nýju. Viðskiptahallinn dragist hratt saman og verði um 7% af landsframleiðslu, hann nemur núna nálægt 20%. Atvinnuleysi fari yfir 3% og verðbólgan verði komin niður í 2,3% að meðaltali.

Verðbólguspá Fjármálaráðuneytisins er nokkru lægri en spá Seðlabankans frá í nóvember. Bankinn spáði þá um 4,5% meðalverðbólgu á þessu ári en 2,5% verðbólgu á því næsta.