Skúli Magn. nýr skrifstofustjóri EFTA-dómstólsins

Mbl.is: EFTA-dómstóllinn í Lúxemborg hefur ákveðið að ráða Skúla Magnússon sem skrifstofustjóra við dómstólinn. Skúli mun hefja störf við dómstólinn í apríl 2007. Hann er fyrsti Íslendingurinn til að gegna starfi skrifstofustjóra við EFTA-dómstólinn.

Starf skrifstofustjóra felur í sér ábyrgð á stjórnsýslu og starfsmannahaldi dómstólsins auk þess sem hann sinnir verkefnum sem fulltrúi dómstólsins út á við.

Skúli er 37 ára dómari við Héraðsdóm Reykjavíkur og dósent við Háskóla Íslands. Hann er lögfræðingur frá Háskóla Íslands og með Mag. jur. gráðu í Evrópurétti og samburðarlögfræði frá Oxford-háskóla.

Skúli er höfundur fjölmargra rita og ritgerða um m.a. réttarheimspeki og stjórnskipunarrétt. Hann hefur átt sæti í fjölda nefnda á vegum hins opinbera sem unnið hafa að gerð lagafrumvarpa.