Kona forstjóri Pepsi

Framkvæmdastjóri fjármálasviðs Pepsi, Indra K. Nooyi, tekur við starfi forstjóra Pepsi þann 1. október af Steven Reinemund. Í yfirlýsingu frá Reinemund kemur fram að ástæðan fyrir því að hann hættir sem forstjóri Pepsi sé að hann vilji eyða meiri tíma með fjölskyldunni.

Reinemund, sem er 58 ára gamall, verður áfram stjórnarformaður félagsins þar til í maí á næsta ári. Reinemund, sem hefur starfað hjá Pepsi í 22 ár, hefur verið forstjóri og stjórnarformaður félagsins í fimm ár.

Nooyi, sem er fimmtug, hefur verið hjá Pepsi frá árinu 1994, þar af sem framkvæmdastjóri fjármálasviðs frá árinu 2001. Hún verður fimmti forstjóri Pepsi frá stofnun félagsins fyrir 41 ári.

Hagnaður Pepsi jókst um 14% á öðrum ársfjórðungi sem lauk þann 17. júní sl. Nam hagnaðurinn 1,36 milljörðum dala eða 80 sent á hlut. Tekjur félagsins jukust um 12% og voru 8,6 milljarðar dala.

frétt af www.mbl.is