Framhaldsskólar: Stytting enn inn í myndinni

Rúv.is: Menntamálaráðherra segir ekki vera búið að taka styttingu framhaldsskólanáms út af borðinu. Styttra nám rúmist innan tillagna um starfsnámsmiðað nám, sem nefnd ráðherra hefur unnið að.

Þorgerður Katrín Gunnarsdóttir segist vonast til að nefndastarfi menntamálaráðuneytisins og kennarasambandsins um starfsemi framhaldsskóla landsins ljúki í janúar. Hún segist hafa beint því til nefndarmanna að þeir taki sérstakt tillit til niðurstaðna í skýrslu um starfsnám, sem birt var í sumar. Þar kemur fram að framvegis verði aðeins eitt stúdentspróf, hvort sem fólk komi af bóknáms- eða starfsnámsbrautum.

Rætt var við Jón B Stefánsson, skólameistara Fjöltækniskólans, formann nefndarinnar í Speglinum í vikunni. Hann sagði umræðuna um þriggja ára framhaldsskólanám ekki alveg eiga heima í tillögum nefndarinnar. Hann líti svo á að verði tillögur nefndarinnar ráðandi þá sé umræða um þriggja ára framhaldsskólanám í raun komin út af borðinu. Frekar eigi að ræða innihald námsins í stað þess að ræða þann tíma sem námið eigi að taka.

Þorgerður Katrín segir að styttra framhaldsskólanám rúmist innan tillagnanna og að unnið verði áfram að því að reyna að breyta námsskipaninni. Hún segir að byggja verði upp menntakerfi sem geri þeim unglingum sem búnir séu að ákveða framtíðarstarf sitt, kleift að sérhæfa sig í námi sínu. Auðvelt sé að byggja upp skólakerfi sem taki líka tillit til þeirra sem ekki hafi ákveðið sig.